kandy news web
kandy news web

වෙළෙන්දන් අඩුවීමෙන් දඹුළු එළවලු අලෙවි කර ගත නොහැකි තත්ත්වයක්

කාංචන කුමාර ආරියදාස - දඹුල්ල

0 49

රටේ පවතින ආරක්ෂක  තත්ත්වය සමඟ එළවළු මිලදී ගැනීමට එන වෙළෙන්දන් අඩුවීම හේතුවෙන් දඹුල්ල ආර්ථික මධ්‍යස්ථානයේ ගොවීන් රැගෙන ආ එළවලු විශාල ප්‍රමාණයක් අලෙවි කරගත නොහැකිව දැඩි තදබදයක් පවතින බව ගොවීහු පෙන්වා දෙනවා.

මේ හේතුවෙන් දඹුල්ල ආර්ථික මධ්‍යස්ථානයට රැගෙන ආ එළවළු කිලෝව රුපියල් දහයකට හෝ අලෙවි කර ගැනීමට නොහැකි බවයි ගොවීන් පවසන්නේ.

AD2

ගොවීන් විසින්  රැගෙන ආ එළවලු  තොග දඹුල්ල ආර්ථික මධ්‍යස්ථානය තුළ පිරී ඉතිරී ගොස් තිබෙන අතර විශාල එළවළු පිරවූ ලොරි ප්‍රමාණයක් ප්‍රධාන මාර්ගය දෙපස නවතා තිබෙන ආකාරයද දැක ගැනීමට හැකියාව ලැබෙනවා.

ගොවීන් කියා සිටියේ එළවළු මිලදී ගැනීමට පැමිණෙන දුර බැහැර ප්‍රදේශවල වෙළෙන්දන් නොපැමිණීම නිසා තම නිෂ්පාදන අලෙවි කර ගැනීමට නොහැකිව වෙළඳපොලේ තබා තිබෙන බවත් පසුව මෙම එළවළු ඉවත් කිරීමට සිදුවන බවයි.

වම්බටු, මෑකරල්, මාළු මිරිස්, අමුමිරිස්, ලීක්ස්, කැරට්, බීට් ආදී එළවළු විශාල වශයෙන් දඹුල්ල ආර්ථික මධ්‍යස්ථානයට ගොවීන් විසින් රැගෙනවිත් තිබෙන අතර ඒවා කිලෝවක් රුපියල් 10 සිට 30 දක්වා වූ මිලක සඳහන් කළ ද එම මිලට හෝ තම නිෂ්පාදන මිලදී ගැනීමට වෙළෙන්දන් නොමැති බව ඔවුන් පවසන්නේ දැඩි වේදනාවෙන් යුතුවයි.

පසුගිය දින කිහිපයේ ද මෙයාකාරයෙන් ගොවීන් අරගෙන ආ එළවළු තොග විශාල වශයෙන් ඉවත් කිරීමට සිදුවූ බවත් 27 දින අළුයම වන විට දඹුල්ල ආර්ථික මධ්‍යස්ථානයට එළවළු කිලෝ ලක්ෂ දහයකට ආසන්න ප්‍රමාණයක් ලැබී තිබෙන බවත් ව්‍යාපාරිකයෝ කියා සිටියා.

රටේ පවතින අයහපත් ආරක්ෂක තත්ත්වය හේතුවෙන් බොහෝ එළවළු ගොවීන් ද තම නිෂ්පාදන රැගෙන නොයන බවත් ඇතැම් ගොවීහු පවසනවා.  දඹුල්ල ආර්ථික මධ්‍යස්ථානය තුළ  27 උදෑසන වන විට දැඩි තදබදයක් පැවතිණි. ඒ පසුගිය දින කිහිපයේම අස්වනු නෙළා රැගෙන ඒමට නොහැකිව සිටි ගොවීන්ද එක වරම අස්වනු වෙළඳපොලට රැගෙන ඒම හේතුවෙනි.

ව්‍යාපාරිකයන්ට කියා සිටියේ කෙසේ හෝ ආර්ථික මධ්‍යස්ථානයට ගොවීන් රැගෙන ආ එළවළු කීයකට හරි අලෙවි කිරීම සඳහා දැඩි උත්සාහයක නිරතවන බවයි. එහෙත් වෙළෙන්දන්ගෙන් නොපැමිණීම හේතුවෙන් ගොවීන්ට විශාල පාඩුවක් සිදුවිය හැකි බව ඔවුහු පෙන්වා දෙනවා.

- Advertisement -

You might also like

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More